अवशेष*

इथे पडले आहेत भग्न अवशेष 
एके काळीच्या प्रगत संस्कृतीचे
कोण जाणे कुठल्या हिंसक, विध्वंसक ज्वालामुखीने 
गाडली तिला आपल्या धगधगत्या राखेखाली

इथे पडले आहेत भग्न अवशेष 
एके काळीच्या जिवंत समाजाचे
कोण जाणे कुठल्या भीषण, भयानक भूकंपाने
भुईसपाट केले त्याला आणि मांडले हे दगडधोंड्यांचे ढीग

इथे पडले आहेत भग्न अवशेष 
एके काळीच्या भव्य ऐतिहासिक शहराचे
कोण जाणे कुठल्या महापुराने 
पुरून टाकले त्याला काळ्या मातीच्या कांबळ्याखाली 

इथे पडले आहेत भग्न अवशेष 
कोणा एकाच्या लाघवी मैत्रीचे 
कोण जाणे कुठल्या सूडकरी दुष्कृत्याने
करून टाकल्या तिच्या हजारो धारदार कपच्या

इथे पडले आहेत भग्न अवशेष 
कोणा एकाच्या प्रणयी वैवाहिक जीवनाचे
कोण जाणे कुठल्या बेलगाम प्रतारणेने
चेतवली त्यात अविश्वासाची अमंगल आग 

इथे पडले आहेत भग्न अवशेष 
कोणा एकाच्या सुखी, समाधानी आयुष्याचे
कोण जाणे कुठल्या दैनंदिन झिजेने
केली त्याची माती माती 
आणि आणि काही अशनी तेवढे सोडले...असंतुष्टतेचे