परवा*

परवा मला वाटलं, मला येशू दिसला
एका सुताराचा छोटा मुलगा
त्याला रंधा मारायला मदत करत होता

परवा मला वाटलं, मला मोझेस दिसला
एक भोळाभाबडा धनगर
आपल्या म्हशींना नाल्यातून पार नेत होता

परवा मला वाटलं, मला महंमद दिसला
एक म्हातारा शिंपी 
आपल्या अधू डोळ्यांनी सुईत दोरा ओवत होता

परवा मला वाटलं, मला बुद्ध दिसला
एक आंधळा भिकारी
आपला निर्जीव हात उचलून दात्यांना आशीर्वाद देत होता

परवा मला वाटलं, मला झरतुष्ट्र दिसला
एक थकलेला पेन्शनर
त्याच्याचसारख्या दुसऱ्याचा हात धरून रस्ता ओलांडत होता

तुम्ही उभारा तुमची चर्चेस
तुमची मंदिरं, तुमच्या मशिदी
मी माझा धर्म घडवतोय
या दुबळ्या देवदूतांच्या संदेशातून