आग*

कुठली आग जळतेय तुझ्या अंतरंगात?

संध्याकाळी शुभंकरोति म्हणणाऱ्या
इटुकल्या घरातल्या मिणमिण पणतीतली आग?

काकड आरतीच्या वेळी भक्तजनांना आळवून
आमंत्रण देणाऱ्या शांत लामणदिव्यातली आग?

आकाशातल्या तार्यांना वाकुल्या दाखवत
लुकलुक उडणाऱ्या काजव्यातली आग?

वादळी समुद्राच्या लाटांवर लटपटणार्या होड्यांना 
दिशा दाखवणार्या दीपगृहातली आग?

राखेतून जन्मलेल्या मानवाची परत
राखेकडे रवानगी करणारी स्मशानातली आग?

अनंत अणुस्फोटांच्या यज्ञात स्वतःची आहुती देऊन
आपल्या जगाला उजळून टाकणाऱ्या सू्र्यातली आग?

सांग मला...
कुठली आग जळतेय तुझ्या अंतरंगात?